Matthew 10

UJesu Uthumela Abalitshumi Lambili

1UJesu wabizela ndawonye abafundi bakhe abalitshumi lambili wabapha amandla okukhupha imimoya emibi lokusilisa zonke izifo lemikhuhlane.

2Amabizo alabo abalitshumi lambili yila: Owokuqala nguSimoni, othiwa nguPhethro, lo-Andreya umfowabo; uJakhobe indodana kaZebedi, loJohane umfowabo;

3uFiliphu loBhatholomewu; uTomasi loMathewu umthelisi; uJakhobe indodana ka-Alifewu, loLabewu osibongo sakhe sasinguThadewu;

4uSimoni umZilothi loJuda Isikariyothi onguye belu owamnikelayo.

5Laba abalitshumi lambili uJesu wabathumela, wabalaya wathi, “Lingayi phakathi kwabezizwe futhi lingangeni lakuliphi idolobho lamaSamariya.

6Kodwa yanini ezimvini ezilahlekileyo zako-Israyeli. 7Ekuhambeni kwenu tshumayelani leli ilizwi: ‘Umbuso wezulu ususondele.’ 8Philisani abagulayo, vusani abafileyo, hlambululani abalobulephero likhuphe amadimoni. Lamukelisiwe kungelambadalo, lani phanini kungelambadalo. 9Lingaphathi igolide loba isiliva loba ithusi emixhakeni yamabhanti enu;

10lingathwali zikhwama ekuhambeni kwenu loba isigqoko sokuntshintsha, loba amanye amanyathela kumbe olunye udondolo; ngoba osebenzayo ufanele aphiwe okokuziphilisa.

11“Loba yiliphi idolobho kumbe umuzi elingena kuwo dingani umuntu ofaneleyo lihlale endlini yakhe kokuphela lize lisuke khona.

12Akuthi nxa lingena kulowomuzi liwunxusele ukuthula. 13Aluba lowomuzi ufanele, ukuthula kwenu akube kuwo; kodwa uma lingemukelwa aginyeni amazwi enu okuthula. 14Nxa engekho olamukelayo kumbe olalela amazwi enu thintithani uthuli ezinyaweni zenu nxa selisuka kulowomuzi loba lelodolobho. 15Ngiqinisile ngithi kini kuzakuba ngcono eSodoma leGomora ngelanga lokwahlulelwa kulokuzakwehlela lelodolobho. 16Ngilithumela ezindaweni linjengezimvu phakathi kwezimpisi. Ngakho qaphani njengezinyoka kodwa libe msulwa njengamajuba.

17“Libalimuke abantu; bazalimangalela ezinkundleni zamacala, balibhaxuze emasinagogeni abo. 18Ngenxa yami lizamiswa phambi kwababusi lamakhosi ukuze libe ngofakazi kubo lakwabezizwe. 19Kodwa nxa belibopha linganqineki ukuthi lizathini lokuthi likutsho kanjani. Ngalesosikhathi lizakwambulelwa okumele likutsho, 20ngokuba kuzakuba kungayisini elikhulumayo, kodwa kunguMoya kaYihlo ozabe ukhuluma ngani.

21“Umuntu uzanikela umfowabo ukuthi abulawe, loyise anikele umntwana; abantwana bazahlamukela abazali bababulale. 22Bonke abantu bazalizonda ngenxa yami, kodwa lowo omayo aqine kuze kube sekupheleni uzasindiswa. 23Nxa lihlukuluzwa endaweni ethile, balekelani kwenye. Ngilitshela iqiniso ukuthi kaliyikuqeda ukuwahambela wonke amadolobho ako-Israyeli iNdodana yoMuntu ingakafiki.

24“Umfundi kangaphezulu komfundisi wakhe, kumbe isisebenzi sibe ngaphezulu komqatshi waso. 25Kasuthiseke umfundi ukuba njengomfundisi wakhe, lesisebenzi ukuba njengomqatshi waso. Aluba umninimuzi kungathiwa nguBhelizebhubhi, pho kuzathiwani ngabendlu yakhe na?

26“Ngakho lingabesabi. Kakulalutho olufihliweyo olungayikudalulwa, loba oluthukuziweyo olungayikwenziwa ukuthi lwaziwe. 27Lokhu engilitshela khona emnyameni kukhulumeni ekukhanyeni kwemini, okunyenyezwa ezindlebeni zenu kumemezeleni lisezicholo zezindlu. 28Lingabesabi labo ababulala umzimba kodwa bengeke babulale umphefumulo. Kodwa yesabani lowo ongabhubhisa kokubili umphefumulo lomzimba esihogweni. 29Izintaka ezimbili kazithengiswa ngendibilitshi na? Kodwa kayikho leyodwa yazo ewela phansi ingavunyelwanga nguYihlo.

30Kwala zona izinwele zamakhanda enu zibaliwe. 31Ngakho lingesabi; liligugu elidlula izintaka ezinengi.

32“Loba ngubani ongivuma phambi kwabantu lami ngizamvuma phambi kukaBaba ezulwini. 33Kodwa lowo ongiphikayo phambi kwabantu lami ngizamphika phambi kukaBaba ezulwini.

34“Lingakhumbuli ukuthi ngilethe ukuthula emhlabeni. Kangizanga ukuletha ukuthula kodwa inkemba. 35Ngoba ngize ukuxabanisa ‘indoda loyise, indodakazi lonina umalokazana loninazala –

36izitha zomuntu zizakuba ngabendlu yakhe.’

37“Lowo othanda uyise loba unina kulami kangifanelanga; lowo othanda indodana yakhe loba indodakazi yakhe kulami kangifanelanga;

38njalo lowo ongathathi isiphambano sakhe angilandele kangifanelanga. 39Loba ngubani ozuza impilo yakhe izamlahlekela, njalo lalowo olahlekelwa yimpilo yakhe ngenxa yami uzayizuza.

40“Lowo olamukelayo wamukela mina, lalowo owamukela mina wamukela lowo ongithumileyo. 41Loba ngubani owamukele umphrofethi ngokuba engumphrofethi uzazuza umvuzo womphrofethi, njalo lalowo owamukela umuntu olungileyo ngokuba engumuntu olungileyo uzakwamukela umvuzo womuntu olungileyo. 42Njalo loba ngubani onganathisa kumbe inkomitshi yamanzi aqandayo komunye walaba abancinyane ngokuba engumfundi wami, ngilitshela iqiniso, akazukulahlekelwa ngumvuzo wakhe.”